Oleh: Pdt Banner Siburian, MTh
Tema Natal taon 2023 i ma Lukas 2 ayat 14: “Hasangapon ma di Debata na di ginjang, dame ma di tano on, di angka jolma halomoan i”. Laos udut ni i do tema Natal PGI/KWI taon 2024 on, na dienet sian Lukas 2 ayat 15: “Beta ma hita tu Betlehem, taida ma na masa on, na pinabotohon ni Tuhan i tu hita”.
Marendeende do angka surusuruan dohot torop parangan par banua ginjang. Dipujipuji nasida do Debata: “Hasangapon ma di Debata di ginjang, dame ma di tano on, di angka jolma halomoan i”. Di na laho angka surusuruan dompak ginjang, masipandohan ma angka parmahan i: “Beta ma hita tu Betlehem, taida ma na masa on, na pinabotohon ni Tuhan i tu hita” (15).
Boha ma rumang ni parborhatta tu Betlehem ? Adong saotikna tolu na sinunggul ni tema Natal on tu hita ganup marsada-sada, tu keluarga nang tu bansonta pe, manggohi pardalanta borhat tu Betlehem. Dia ma i ?
_Parjolo: Nunga ro Debata manopot hita hajolmaon._ Ditopot Debata do angka parmahan, na tongon mangula ulaonna siapari, na tongon mangaramoti na pinarmahanna. Ndang tu istana borhat angka surusuruan i, ndang tu kota metropolitan, jala ndada tu bagas joro na tongon di parmingguan martangiang mangalompit tangan. Ndada holan di bagasjoro hita ditopot Debata, alai di ganup ulaon si ganup ari do.
Ditopot do hita di realitas ni parngoluon, di jabu nang di balian, di partigatigaan, di ladang manang di parmahanan, di kantor, di lapangan, di pertambangan. Ditopot do hita na tongon mamboan grab, angkot ro di ragam ni transportasi. Ditopot nang hita tagan tarduru jala dipasisi, tagan so masuk etongan ni hajolmaon, angka na tongon karejo lembur di borngin na holom. Debata na “omni-presence” do Tuhanta i manopot hita di ragam ni partingkian nang di ragam panggulmiton ni ngolu. Ris do hita ditopot Tuhanta i. Las ma rohanta.
Di na ditopot Debata hita, huhut do digohi suksuk las ni roha. Dipaunsat do ngolunta sian na nidondonan portibi morot gabe gok olopolop.Jolma na metmet, na so mardihadiha jala lea, dipaunsat marsaulihon hatuaon sian Tuhan i. Horong ni hajolmaon na “the last, the least, and the lost” gabe sipatujoloon, lumobi marsaulihon hatuaon i. Jolma na lea gabe sangap. Dipatau gabe Parbarita na Uli, sitindangi na ummangat taringot tu Barita Haluaon i. Gabe bagian ni Sejarah haluaon nasida, ala oloan di Debata sian sumolsoli haleaon ni dirina.
Paduahon: Tapadoras ma langkanta manghaporseai Tuhan i._ Manangihon jala manjalo barita haluaon i, ndang gabe so angka parmahan i longang sambing. “Move on” do nasida. Masibetabetaan do nasida borhat tu Betlehem marnida na masa i. Ndada holan borhat boti, alai hatop (“cepat-cepat”, “hurried off”) do borhat. Ndada so margira tudia. Ndang marheneshenes. Doras do nasida mangalangkahon silangkahononna.
Di na tolhas hita tu ari natal on, tapadoras ma langkanta manghaporseai Tuhan i. Songon parmahan i, hibul do roha nasida borhat mangalangka nionjar ni haporseaonna. Ndang ganggu roha nasida di hata ni Debata marhite surusuruan i. Ndang marsurasura ni roha nasida: “Tutu do hulaning na masa on” ? Tiur do roha nasida mangantusi jala manjanghon Barita na uli i. Tapadoras ma langkanta, taharinggashon ma mandapothon Tuhanta i huhut mangoloi HataNa.
Ditinggalhon angka parmahan i do satongkin ulaonna laho manjalahi na rumingkot. Ditadinghon do ulaon mansari ngolu laho manghalaputi hangoluan na tutu. Diharingkoti do skala prioritas sumarihon na dao rumingkot. Gabe jumpangsa ma posoposo i. Di na doras nasida mangalangka, ndang luangan nasida, alai dapotan do huhut marsaulihon hatuaon dohot las ni roha. Jumpang (“encounter”) ma na niluluan, dapot na jinalahan.
_Patoluhon: Halaputi ma Ulaon Marbarita Nauli._ Mulak do angka parmahan i, pasangap jala papujipuji Debata. Ndang lalap nasida monggop di panggagatan i. Marolopolop do roha nasida mulak, ala naung diida jala dihatindanghon nasida barita las ni roha i. Ndang mulak balging angka na ro di bagasan roha na ias tumopot Tuhan i, mulak do nasida di bagasan olopolop. Mulak ma muse nasida tu ulaon si ganup ari pinaborhat ni haluaon i. Ndada holan na mansari ngolu be nasida di ulaon i, alai mangarongkom ulaon i gabe pentas hamuliaon ni Debata (“Gloria Thetron Dei”).
Ngolu na mar-Tuhan, ndang gabe manadinghon salelengna ulaon si ganup ari. Gariada dihalaputi ma ulaon marbarita na uli marhite ulaonna, radot jala padot di ulaonna so pola gabe mansuasaehon ulaonna siganup ari.
Ndada dirina nasida dibaritahon, alai Sipalua naung tubu i do. Mardame sonang ma hita mangula ulaonta si ganup ari sadenggan-dengganna. Kinerja na dumenggan di ulaonta ariari, gabe panindangion do i di naung tajalo denggan basa ni Debata di bagasan Jesus Kristus, Sipalua i. Selamat Natal 2024 ma di hita saluhutna. Amen !
_*) Pandita HKBP Ressort Rawamangun, Jakarta Timur_
Komentar